Günümüzdə eyni masa ətrafında oturan ailə üzvləri eyni anda tamamilə fərqli dünyalarda ola bilirlər: biri Instagram-da, digəri məktəb tapşırığını telefonla yazır, ana e-mail cavablayır, ata xəbər başlıqlarını oxuyur... Və beləliklə yemək – sadəcə qida deyil, münasibət də qidalanmadan bitir. Halbuki ailəvi yemək saatları həm fiziki doyum, həm də emosional bağ üçün ən gözəl fürsətlərdən biridir. Sadəcə bir şərtlə: əllərdə telefon yoxdursa.
Telefonlar gündəlik həyatımızın ayrılmaz hissəsidir, bəli. Amma yemək vaxtı bu cihazlar ailənin birlik enerjisini tükəndirən görünməz divarlara çevrilə bilər. “Uşağım yeməkdə danışmır”, “Hamı susur, öz işi ilə məşğuldur” deyən valideynlər üçün bəzən yeganə çatışmayan şey başlanğıcdır. Söhbət etmək istəsək də, bəzən nədən başlaya biləcəyimizi bilmirik.
Gəlin, əvvəlcə bir qərar verək: yemək masası rəqəmsal yox, real ünsiyyət yeri olsun. Və sonra yavaş-yavaş bu suallarla bir söhbət quraq:
– “Bugün səni nə güldürdü?”
– “Məktəbdə/işdə qəribə bir şey oldu?”
– “Əgər sabah tətildə olsaydıq, hara gedək istəyərdin?”
– “Bir gün bir heyvana çevrilsəydin, hansı olardın və niyə?”
– “Bütün gün evdə bir telefon olmadan keçsəydi, nə edərdin?”
Bu suallar sadə görünə bilər, amma ailə üzvləri arasında təxəyyül, xatirə paylaşımı, hiss bölüşümü yaradır. Ən əsası – bunlar öyrədici deyil, birləşdirici suallardır. Sual verildikcə cavab gəlir, cavab gəldikcə ailə bağları yenidən toxunur.
Təklif edirik ki, ailə yeməklərində “telefon səbəti” qoyulsun – yemək boyunca bütün cihazlar orda dursun. Əvvəl çətin olacaq, amma sonra bir adətə çevriləcək. Uşaqlar da böyüklər də hiss edəcək ki, masadakı bu yeni səssizlik – tək-tük deyil, dinləyici səssizliyidir.
Ailəvi yeməklər sadəcə “nə yedik?” deyil, “nə danışdıq?” sualı ilə xatırlanmalıdır. Çünki yeməklə dolan boşqablar bir saat sonra unudular, amma duyğuyla dolan anlar illərlə xatırlanar.
Yemək masası yalnız yemək üçün yox, görünməyən bağların toxunduğu yerdir.
Birlikdə oturmaq onsuz da gözəldir – birlikdə danışmaq isə ailəni yaşadır.
Telefonu bir kənara qoyub bir sual verməklə, bəlkə də günün ən gözəl anını yaradacaqsınız.