20 fevral 2025-ci il tarixində Bakı Xoreoqrafiya Akademiyasının Kitabxana İnformasiya Mərkəzinin təşkilatçılığı ilə "Milli Dəyərlər və Vətəndaşlıq – VƏTƏN" layihəsi çərçivəsində təlim-seminar keçirilib. Tədbirdə vətənpərvərlik, milli dəyərlər və vətəndaşlıq mövzularına toxunulub.
Seminarın açılışında vətənpərvərliyə həsr olunmuş musiqi səsləndirilib. Mahnının sözləri tanınmış yazıçı, publisist və jurnalist Aydın Tağıyevə məxsusdur. Onun qələmə aldığı sözlər tədbirin atmosferini daha da gücləndirib və iştirakçılara vətən sevgisini dərin hiss etdirməyə kömək edib.
Təlim-seminarı Aydın Tağıyev təqdim edib. O, milli dəyərlər, vətənpərvərlik və vətəndaşlıq anlayışları barədə dəyərli fikirlərini bölüşərək, gənclərə maraqlı faktlar və faydalı tövsiyələr verib. Tədbirdən sonra təşkil olunan dəyirmi masa iştirakçılar arasında fikir mübadiləsinə və yeni dostluqların qurulmasına şərait yaradıb.
Bu kimi maarifləndirici tədbirlər cəmiyyətdə milli şüurun inkişafına və gənclərin maarifləndirilməsinə böyük töhfə verir. Tədbirin iştirakçıları belə təşəbbüslərin davamlı olmasının vacibliyini vurğulayıblar.
Sonda tədbirin təşkilatçılarına və Aydın Tağıyevə minnətdarlıq ifadə olunub. "Milli Dəyərlər və Vətəndaşlıq – VƏTƏN" layihəsi çərçivəsində gələcəkdə də bu cür görüşlərin keçirilməsi planlaşdırılır.
